Friday, January 31, 2014

ලොකු දෝණී



"කොහෙන්ද උඹට පෝන් එකක් ...ඇත්ත කියාපන් ....."

"මගේ යාලුවෙක් තාත්තේ දුන්නේ ..."

"කවුද යකෝ මේ ගමේ හතරමහා නිධානෙ පහලවෙච්ච මං නොදන්න උඹේ යාලුවා .......ලොක්කියේ ඇත්ත කියාපන් ...මගේ යකා අවුස්සන්නේ නැතුව......."

"යාලුවෙක් යාලුවෙක් යාලුවෙක්....කිව්වට තාත්තා දන්නේ නෑනේ... මැහුම් පන්තියට එන යාලුවෙක්..."

"තාත්තේ ඕක අක්කට ජනක අයියා දුන්නේ ...."

"යනවා පොඩ්ඩි  යන්න මෙතන දන්නේ නැතිදෙවල් වලට හොට දාන්නේ නැතුව...."

"කවුද පොඩි පුතේ ජනක අයියා කියන්නේ....."

"අර හැමදාම මෙතනින් බයිසිකලේ යන්නේ ...තාත්තේ ....ඒ අයියා හරි හොඳයි තාත්තේ ..මට හැමදාම මුරුක්කු ගෙනත් දෙනවා .......අක්කට ෆෝන් එක දෙද්දී මට චොක්ලට් එකකුත් දුන්නා .....මේ එකේ තිබ්බ ස්ටිකරේ ..."

තාමත් අවුරුදු හතක පමණ වූ කුඩා දියණිය ගිරවියක මෙන් කියවද්දී   රත්නසේන බාස් ගේ කන්දෙකෙන් ගින්දර පිටවෙන්නාක් මෙන් විය . 

බුදු පින්තූරයට පහලින් එල්ලා ඇති තම බිරිඳගේ පින්තූරය දෙස රත්නසේනට බැලුනේ ඉබේටමය.. 

"අයි හත් දෙයියනේ ඔයාට මං ඔච්චර එපා කියද්දීත් මේ ගමන ගියේ..අවුරුදු තුනක් කියන්නේ සුළුපටු කාලයක්ද..? මේ ලමිස්සියෝ දෙන්නෙක් එක්ක මම මේවා කොහොම කරන්නද.....?"

මීට මාස හතකට පමණ පෙර යස ඉසුරු සොයා තම දැඩි විරුද්ධත්වය මැද්දේ විදේශ ගත වූ තම බිරිඳ කෙරෙහි ඔහු තුල ඇතිවූයේ කෝපයකි..

"මෙහෙ දීපිය ඔය බඩ කඩුත්තුව ...."

*******

දිනකට හත් අට සැරයක් තම ගේ ඉදිරිපස පාරෙන ට්‍රේල් වර්ගයේ යතුරුපැදියක් සැර දමමින් යන තරුණයා රත්නසේන බාස්ට හොඳටම මතකය......

"කවුද නිමල් මේ පෝරිසාදයා .....අරෙහෙ ලොකු කෙල්ල විභාගෙට පාඩම් කරනවා ......දැන් හතර සැරයක් විතර මෙතනින් ගියා ..මහා සද්දෙට...."

වට පිට බැලූ නිමල් රත්නසේන බාස් වෙත ලං වූයේ රහසක් කියන්ට මෙනි......

"බාසුන්නැහැ ...ඔය තමයි අර ජනක කියන එකා ....අර කුඩු අබ්දුල්ගේ ගෝලයා.....ඔන්න ඔහේ යන දිල්ලියක ගියාවේ නිකං ඕකුන් එක්ක පැටලෙන්න යන්න එපා ...මහා තිරිසන්නු....." 

ගේ ඉදිරිපිට පාර අද්දරට වන්නට ඇති වඩු මඩුවේදී තම ගෝලයා වන නිමල් සමග මීට මාස කීපයකට පෙර ඇතිවූ දෙබස රත්නසේනට මතකයට නැගෙන්නට විය........
එදා ඔය කියන බයිසිකලේ සද්දෙට පාරේ යනවිට නිකමට ගේ දිහා බලද්දී ලොක්කි ජනෙල් තිරය පහත දමා ජනේලය ලඟින් මෑත් වෙන හැටි දුටුවිට ඒ පිලිබඳ විශේෂ හැගීමක් එවෙලේ ඇති නොවුනත් දැන් රත්නසේන බාස්ට සියල්ල සක් සුදක් සේ පැහැදිලි වන්නට විය . 


*******

"මට තිබුනේ පාරක් දෙකක් ගහලා හරි ගෑනි රට යන එක නවත්තගන්න ....දැන් මොනවා කියල කොරන්නද දෙයියනේ....."

කොහොමටත් ලොක්කි මුරණ්ඩුයි කියලයි .නොගැලපෙන පෙම්හබ වල පැටලෙනවායි  කියලනේ කේන්දරේත්  තිබ්බේ... කේන්දරේ තිබ්බ ඒ කතා ව ඇත්තයි කියලා රත්නසෙනට හිතුනු දෙවැනිවතාව..

විභාගෙට මාස දෙකකට විතර කලින් ඉස්කෝලේම පිරිමි ළමයෙක් එක්ක තිබ්බ සම්බන්දෙ ප්‍රින්සිපල් හාමුදුරුවන්ගේ අතටම අහුවෙච්ච වෙලාවේ ...ප්‍රින්සිපල් හාමුදුරුවෝ රත්නසේනට කියපු දේ තාම ඇහෙන්නා ඇහෙන්නා වගේ ..

"රත්නසේන බාසුන්නහේ ...විභාගේ ළඟ හින්දයි මම මේ සමාව දෙන්නේ...දෙමව්පියෝ වුනාම මීට වඩා වගකීමෙන් ළමයි ගැන හොයලා බලන්න ඕනේ .."

රත්නසේන පියවිලොවට ආවේ ලී ගේට්ටුව ඇරෙන කිරි කිරි සද්දේ ඇහුනු නිසා ...
"කොහෙද උඹ යන්නේ ..."

"මැහුම් ක්ලාස් ....ඇයි...?

"නෑ ඕනේ නෑ .....උඹේ පන්ති යැවිල්ල දැන් ඇති.."

"අනේ තාත්තේ...."

"අනේ පනේ ඕනේ නෑ ...පලයන් ගෙට මම නරක මිනිහ කරගන්නේ නැතුව.....අර රස්තියාදු කාරයා එක්ක රවුං ගහන්න......උඹලා අම්ම හිටියනං උඹව ඇහේ ඉඳන් පට්ට ගහනවා...."

"හහ අම්මා හිටියනං......?"
"අම්ම හිටියනං හොඳයි තමයි.... අම්ම ජනක අයියව දන්නවා......අම්මට රට යන්න ඒජන්සිය හොයලා දුන්නෙත් ජනක අයියා .....හහ්.. අම්ම ආපුවාම බලාගමුකෝ කවුද දිනන්නේ කියලා ......."

ලොක්කි ගස්ස්ගෙන හැරිලා යන හැටි බලන් ඉන්නකොට රත්නසේනගේ ඇස දෙකට කඳුළු උනන්න ගත්තේ නිකම්ම.......රටේ ලෝකේ මිනිස්සු වහෙන් ඔරෝ කියන දේවල්  කනට වැටිලා තිබුනත් ඒ දේවල් වල තමුන් නොදන්නා තව ගොඩක් දේවල් තියෙනද කියන සැකේ රත්නසේනට ආවා .

"ඉතින් අම්ම වගේම නැතා දූ පොඩ්ඩත්....මං උඹට හූනා කියන්නහේ කිව්වා මලේ... උඹ ඒකිගේ පොත්තට රැවටුනා...දැන් ඉතින් බැඳගත්තා නම් බෙරේ ගහපං.... පොට වරද්දගත්තම එන්න විතරක් එපා හතර මායිමේ .."
 ලොකු කෙල්ලගේ ඉස්කෝලේ පලහිලව්ව ආරංචි වෙච්ච දා සමූපෙදී හම්බවෙච්ච අක්කා කියපු කතාව රත්නසෙනට ආයෙත් මතක්වුනා.

ඇත්තටම මල්කාන්තිට තිබුනේ තමුන් වගේ මනුස්සයෙකුට නොගැලපෙන ලස්සනක්ද කියලත් රත්නසෙනට දැන් හිතෙනවා ..

රත්නසේන මල්කාන්තිව බලන්න ගිය පළවෙනි දවසේ ඉඳන්ම මල්කාන්තිව රත්නසේනට බන්දලා දෙන්න මල්කාන්තිගේ අම්මට තිබ්බේ පුදුම හදිසියක් කියලයි ඒ දවස්වල අක්ක නම් කිව්වේ....
"කොහොම හරි අන්තිමට අපේ හරකා කෝම්බයක් කරගහුවා....." අක්කගේ කතාවල තේරුම හොයන්න ඒ දවස්වල උනන්දුවක් නොතිබුනේ තමුන් මල්කාන්තිගේ රූපෙට වහ වැටිච්ච නිසාද කියලත් රත්නසේනට හිතුනා...

අනේ දෙයියනේ......කර කියා ගන්න දෙයක් හිතා ගන්න බැරුව රතන්සේනට තමන්ගේ  ඔලුව තෝන්තු වෙනවා වගේ දැනුනා ...

*******

"පොඩ්ඩියේ ....."

පොඩි දුව පාසල් ඇරී ..නිවසට පැමිණෙනු දුටු රත්නසේන වෙනදා පුරුද්දට මෙන් ඇයට ඇමතුවේය....

"තාත්තේ......"

ඇගේ දත්වලත් උඩු තොලේ හා නහය මැද වියලී ගිය චොකලට් ලාටු තැවරී තිබෙනු දුටු රත්නසෙන සැබවින්ම හිනාවියයුතු වුවත් ......එය දැකීමෙන් ඔහු තුල ඇති වූයේ කුතුහලයකි.

"මෙහාට වරෙන් දුවේ...., මොනවද පුතේ  ඔය මූණ පුරාම ගෑවිලා තියෙන්නේ....?"

"ජනක අයියා මට චොකලට් එකක් දුන්නා .."

"ඒ මොකටද ...?"

"නිකං .....අක්කට මේ පොත ගිහින් දෙන්න කිව්වා ..."

ඇය පෙන්වූ පොත අතට ගත රත්නසේන එහි පිටුවක් නෑර පෙරලා බැලුවේ ලියුමක් දකින අටියෙනි. නමුත් එතුල කිසිවක් නොවීය.....

"හා දීපංකො එහෙමනං " කියා පොඩ්ඩි දෙසට පොත දිගු කල රත්නසේන....

"පොඩ්ඩක් හිටපං....කියා නැවත පොත පෙරලන්නට විය .....එකින් එක පිටු පෙරලන විට එකට අලවා තිබූ පිටු දෙකක් අතර තිබූ ලියුම දුටුවේය.

හාහ් මුන්ගේ ගොරක මදි අපිව තම්බන්න .."

"හත් දෙයියනේ..........."

                            "ආදර නිමන්ති..!
                        
                              ඔයාගේ තාත්තා ඉන්නකං අපි දෙන්නට මෙහෙම දුරින් ඉන්න තමයි වෙන්නේ 
                              ඔයාගේ තාත්තාට ගේමක් දෙන එක මට මහා දෙයක් නෙවෙයි ..ඒත් ඒකට ඔයා 
                              අකමැති නිසා....දැන් අපිට කරන්න ඉතුරුවෙලා තියෙන්නේ එක දෙයයි.

                               තාත්තා පොඩ්ඩක් එහෙමෙහෙ වෙනකං ඉඳලා ඔයා කෙලින්ම දුවන්න 
                               පොලිසියට. ගිහින් කියන්න ,තාත්තා ඔයාට හැමදාම අතවර කරන්න හදනවා
                                ..ඔයා මේ බේරිලා පැනලා එන ගමන් කියලා. අම්මත් රට නිසාත් 
                                 ගෙදර වෙන ගෑනු අය නැති නිසාත් පොලිසිය 
                               ෂුවර් එකටම ඕක විශ්වාස කරනවා. ඔයා චාන්ස් එක ආපු ගමන් යන්න 
                                 යද්දී තීන්ත කඩේ ජයනාත්ට පණිවිඩේ දීගෙන යන්න. 
                                මම එන්නම් පොලිසිය ගාවට , පොලිසියේදී වෙන්න ඕන ටික අබ්දුල් අයියා කරයි .
                              
                                 ජනක 

 රතන්සේනගේ කඳුළු පිරුණු දෑසට  නැවතත් පෙනුනේ  බුදු පින්තූරෙට පහලින් එල්ලා ඇති තම රූමත් බිරිඳගේ ඡායාරූපයයි.....

Monday, January 27, 2014

ඔබද ලක්ෂපති මමද ලක්ෂපති


"ආයුබෝවන් මිත්‍රවරුනි ....අප  සමග එක්වී සිටින සැමට සුබම සුබ සන්ධ්‍යාවක් ප්‍රාර්ථනා කරමින් අපි ආරම්භ කරමු "ඔබද ලක්ෂපති මමද ලක්ෂපති සීසන් තුන"

"ඔව් අද ඔබ හමුවේ ලක්ෂයේ කිරුල හඹා යන්නේ ...." ජහමනයා "

"ඔව් අපි කතා කරමු ...ඔබට මේ තරඟයේ ජයක් ලබාගන්නට පුලුවන් යැයි විශ්වාසයක් තිබෙනවද ..?"

"ඇත්තෙන්ම මම හිතනවා මට ජයග්‍රහණය කරායන්න හැකියාව තිබෙනවා කියලා මොකද මම පුංචිම කාලේ බිව්වේ "පීඩියා ප්‍රෝ"...එක නිසා අනිත් යට වඩා මගේ මොලේ වැඩියි කියලා හැමෝම කිව්වා. මට පූසව සිංහයා කරන්නත් හාවව සීබ්‍රා කරන්න පුළුවන් වුනෙත් ඊට පස්සේ ......"
"ඊට පස්සේ ටිකක් ලොකු වුනාම මම බිව්වේ ඇනිලීන්, ඒක නිසා සංගාගේ ඇට කැඩුනත් මගේ ඇට නියමෙට වැඩ "

"ඔබ සමග මෙතනට පැමිණියේ කවුරුන් සමගද ?"

"මං ආවේ දෙදාස් පන්සීයෙන් ජීවත් වෙන අපේ අප පව්ලේ හතර දෙනා සමග "

"හොඳයි ..මේ ලක්ෂයේ ජයග්‍රහණය ලැබුනොත් ඔබේ බලාපොරොත්තුව කුමක්ද ...."

"මාසෙට දෙදාස් පන්සීය ගානේ වියදම් කරලා හැකිතරම් කාලයක් නොමැරී ජීවත් වීම"

"හොඳයි එහෙනම් මිත්‍ර වරුනි අපි ආරම්භ කරමු "
මුලින්ම මම තීරණය කළා ඔබේ දේශපාලන දැනුම පරීක්ෂා කරන්න .......අපි පටන් ගමු
"ඔබද ලක්ෂපති මමද ලක්ෂපති "


** ලංකාවේ විදේශ ඇමති                          = සජින් වාස්

** කාන්තා කටයුතු ඇමති                          = වෙල්ගම

** ලංකාවේ විපක්ෂ නායක                        = අනුර කුමාර

** එක්සත් ජාතික පක්ෂයේ නායකයා        = රංජන් රාමනායක

** ආණ්ඩු පක්ෂය සමන්විත වන්නේ          = අලියන් හා නිලියන් ගෙන්

** දේශපාලනයේ කාන්තා නියෝජනය වැඩි කිරීමට කුමක් කල යුතුද ? = කාන්තාවන් නිලියන් කල යුතුය.

** විපක්ෂයක ප්‍රධාන කාර්‍යභාරය වන්නේ   = කෙසේ හෝ නායකයා එලවා දැමීම

**ශක්තිමත් විපක්ෂයකට අවශ්‍ය වන්නේ    =  කුරුඳු පොලු



"මේ ..මේ.... සහෝදරයා ඇත්තෙන්ම මේ පිළිතුරු ........................"

"හරියටම හරි නේද ....? එක තමයි මං දන්නවා මම මේ තරඟය අනිවාර්යයෙන්ම ජයග්‍රහණය කරන බව මොකද මාව එව්වේ "තාරුණ්‍යට හෙටක් "එකෙන් ..ලොකු බේබි මට කිව්වා මම අනිවා දිනනවා කියලා . එතුමා කිව්වනම් මොනවද නොවෙන්නේ නේද?"

"ආ....ඔව් ඔව් අපි ඊළඟ ප්‍රශ්න වටයට යමු. මෙහිදී ඔබේ ක්‍රීඩා දැනුම තමයි පරීක්ෂා කෙරෙන්නේ "



** ලංකාවේ ජනප්‍රියම ක්‍රීඩාව                                   =       කැසිනෝ

** ලංකාවේ දක්ෂතම රගර් ක්‍රීඩකයා                        =       යෝෂිත

** ලංකාවේ දක්ෂතම ක්‍රිකට් ක්‍රීඩකයා                      =         රමිත

** ලංකාවේ ජාතික ක්‍රීඩාව                                      =        නයිට් රේස්


ඔව්


"දෙයියනේ ඔබේ දැනුම අති විශිෂ්ටයි ...... තුන්වනිවටයට යමු ආර්ථික හා සාමාජයීය ප්‍රශ්න වටය .. මෙහිදී ඔබට උපකාරක අවස්ථා දෙකක් හිමි වෙනවා .....එකක් ......."

"මේ හලෝ මම දන්නවා ..අනික මට ඕනෙනම් අවස්ථා තිබුනත් නැතත් මම උපකාරේ ගන්නවා පඬියා නොවී ප්‍රශ්න ටික අහනවද ....?"



** ශ්‍රීලංකාවේ විදුලි බල අවශ්‍යතාවයෙන් වැඩි ප්‍රමාණයක් සැපයෙන්නේ  =  මාෆියාවෙන්

** රිය අනතුරු අවම කරගැනීමට ගන්නා පියවරක් වන්නේ =  දවල්ට හෙඩ් ලයිට් දමාගෙන යාම

** සර්වෝදය ව්‍යාපාරයේ නිර්මාතෘ කවුද? = ඔය ඉතින් ප්‍රශ්නේ වැරදිනේ ..නිල බලකායේ නිර්මාතෘ - නාමල්

** ලෝක සිතියමේ වෙනත් රටවල් පහක් නම් කරන්න  = 1. චීනය
                                                                                        2. චීනය
                                                                                        3. චීනය
                                                                                        4. චීනය
                                                                                        5. චීනය

** ලංකාවට වැඩිම බදු ආදායම ලැබෙන්නේ                 = හෙරොයින් වලින් හෝ එතනෝල් වලින්  ම්ම්ම් මම .....ආසක් දී ඕඩියන්ස් අවස්තාව ලබාගන්නවා .......................................................................................................................කාටවත් හිතාගන්න බැරිලු අනිත් එක අහනවා ....

** ලංකාවේ ලාභදායීම වාහනය                                    =          ලැම්බෝගිනි

** අමද්‍යප ව්‍යාපාරයේ පියා                      = දුමින්ද සිල්වා , ජොන්ස්ටන් හෝ ලක්ෂ්මන් වසන්ත  ...මේකට මම කෝල් අ ෆ්‍රෙන්ඩ් අවස්තාව ලබාගන්නවා
 ඒක හරියන්නෙත් නෑ ..මැතිවරණ නීති උල්ලංඝනය වෙන නිසා කාටවත් උත්තර දෙන්න විදිහක් නෑ

** ලංකාවේ ජාතික ගීය                              = සහේලි ගයනාකරන ඕනෑම ගීතයක්

** ජාතියේ පියා                                         = ජේම්ස් පැකර්

** ජාතික වෘක්ෂය                                     = අරලිය ගහ මන්දි....... නාහ් ...හප්  අරලිය ගහ

** ජාතික සත්වයා                                     =  සුදු කැස්බෑවා

"ඔබ....ගේ .....දක්ෂතාවය හිතාගන්නත් බෑ.... මට කලන්තේ වගේ "..................දඩස්.........



Thursday, January 23, 2014

ඔක්කොම ඉවරයි


"මොකද සර් අප්සෙට් එකෙන් වගේ "

 "අයිසේ මම ඉවරයි අයිසේ ....අයියෝ සුමනයවත් මේක කලින් දැක්කේ නෑනේ අම්මපා අඩු ගානේ අර     ශිෂ්‍යත්ව කොල්ලවත් මේක මට කිව්වේ නෑනේ ..."

"මොකක්ද සර් අවුල ......ඇයි අගමැති තුමා අස්වෙනවද ...?

" පිස්සුද මනුස්සයෝ දැන් කියලා ඉතින් වෙනසක් තියෙනවද ..? හිටියත් නෑ වගේනේ ..."

" හරි මම හිතුවා ...කෙහෙළිය ඇමති තුමා අස් වෙනවලු නේද....?

"ඔල්මාදෙද අයිසේ .......මිනිහා මලත් ජනමාධ්‍ය ඇමති කම දාලා යන්නේ නෑ... මටත් වෙලාවකට හිතෙනවා ඕයි මේක නැතුව ජන මාධ්‍ය ඇමතිකම තිබ්බනං කියලා "

"එහෙනම් සර් තව කුඩු කන්ටේනරයක් අල්ලලද ...."

"හැක් හැක් හැක් ......ඔලුගෙඩිය , ඔය අහුවෙච්ච එක පෙන්න පෙන්න තව කීයක් ඇතුලට ගෙනාවා කියලද තමුසේ හිතන්නේ....බැරිම වුනොත් කරන්න තියෙන්නේ අර එතනෝල් ගෙන්වීම නීතිගත කරා වගේ මේකත් නීතිගත කරන එකනේ අයිසේ ...අනේ තමුසෙලා වගේ උපදේශකයෝ......."

"එහෙනං එස්.බී. යයි වගේද සර්..."

"ආ මිනිහා ඉන්නවද...? මිනිහ කැසිනෝ ගැහුවා කියලා කිව්වට පස්සේ ලඟදි ආතල් එකක් දුන්නෙත් නැති නිසා මාත් බැලුව මොකද කියල "

"කේ.පී ගේ ප්‍රශ්නයක්ද සර්."

"මිනිහට දැන් මගෙන් විතරයි අයිසේ පිහිටක් තියෙන්නේ..මිනිහ කියන්නේ මිනිහට ප්‍රභාට කලින් මාව හම්බ වුනානම් කියලා ....."

" එහෙනම් සර් බන්දුල ....."

"අයිසේ මිනිහනම් අදහන්න වටිනා පොරක් අයිසේ ....බලනවා මිනිහා නිසා අපි කොච්චර ප්‍රශ්න වලින් ගැලවෙන්වද කියලා ...දෙදාස් පන්සීයෙන් හතරදෙනෙක් මාසයක් ජීවත් වෙන්න පුළුවන් කියපු එකම මදැයි ඔයි....අපි එකෙන් මාසයක් විතර මීඩියා ටික ඇදගෙන ගියානේ ...දැන් බලනවා ඔය ශිෂ්‍යත්ව කතාව වුනත් ..."

"විමල් ඇමති තුමාගෙන් නම් වරදක් වෙන්න විදිහක් නෑ නේද සර්...මිනිහා සර් කියන දේට පිටින් මුකුත් කියන්නේ නෑනේ.....?"

"හ්ම්ම්...එත් මිනිහා මේ දවස වල හුලාගේ නෙත්තියත් එක්ක පැටලෙන්න යනවනේ ....උසේ හැටියටද වැඩ "

"එහෙනං සර් මොකක්ද ප්‍රශ්නේ...බඩුමිල වැඩියි කියනවද ...?

"හෙක් හෙක් හෙක් මිනිස්සුන්ට බඩුමිල ගානක් නෑ ඕයි මේදවස්වල ..? මිනිස්සු කනවට බොනවට වඩා කරන්නේ මංගල සමරවීරගේ කොල්ලට මොකද වුනේ  කියලා හොයන එක  ...."

"එහෙනම් සර් විපක්ෂ නායක තුමා ආණ්ඩුව පෙරලන්නවත් ගේමක් ගහනවද?

"අයිසේ මේ පොඩ්ඩක් ලඟට එනවකො........"

"ඇයි සර්....."

"කවුද ඕයි මේ රටේ විපක්ෂ නායක......"

"අයි සර් රනිල්නේ ..අර හිටපු ගමන් ඇවිත් කෝපි බීලා යන කොන්ඩේ සුදු පොර..."

"ඔව්නේ යකෝ ..මම මෙච්චර දවසක් හිතන් හිටියේ මිනිහා එංගලන්තේ විපක්ෂ නායක කියලා ..."

"සර් ගණන් ගන්න එපා සර් ඕවට ඉතින් සර් මොනා කරන්නද? "

"මොනවටද?"

"සර් මේ කම්පනා කරන්නේ නොරොච්චෝලේ ආයේ කැඩිච්ච එකනේ ..."

"ඉට්ට .....ඒක කවද්ද ඕයි වැඩකරේ ...හාහ් අන්න බලනවා මේ සැරේ දුන්නේ ගේම රන්දෙනිගල රන්ටඹේ ..කැලණිතිස්ස ඔක්කොම හිටින්න...."

"දැන්නේ සර් මීටර් වුනේ  සර් බයේ ඉන්නේ ජිනීවා කේස් එකට නේද ?

"හෙහ් හෙහ් හෙහ් .....හිනා වෙලා චූ යන්නත් ආවා ඕයි.....ඡන්ද දෙක දිනාගන්න ඔයිට වඩා දෙයක් තියෙනවද අයිසේ. ඕවට තමයි අයිසේ අධිරාජ්‍යවාදී කුමන්ත්‍රණ කියන්නේ ...අපිට ඡන්ද අරන්දෙන කුමන්ත්‍රණ හැක හැක හැක ........"

"අනේ මන්දා සර් මටනම් තේරෙන්නේ නෑ ...අර ගෘහ සේවිකාවෝ ඩුබායි අරින ප්‍රශ්නේ වත්ද ?"

"තමුසෙලාටත් පෙන්නේ ඔය ගෑනියෙක් දෙන්නෙක් රටයන එක තමයි . ඇයි අයිසේ බලනවකො රට පුරා ඇවිදලා දැන් මෙහෙ බදාම අනන්නෙත් චීන්නුනේ ...අපේ කොල්ලෝ ක්ලබ් ගිහින් නයිට් රේස් බලලා මත්තලින් කටුනායක එන අපූරුව චීන්නු අපේ රටේ පාරවල් වල තාර දාද්දි "

අනේ මන්දා සර් මට මෙලෝ දෙයක් තේරෙන්නේ නෑ ...."

"නැතුව ...යමක් කමක් තේරෙන එවුන් නම් මම තමුසෙලාව උපදේශකයෝ කියලා බඳවා ගන්නවයි ...
මෙන්න බලනවා නිව්ස් එක වාසු සන්ධානයෙන් වෙන් වෙයි ? දැන් ඉතින් කොයි වෙලේ ආණ්ඩුව වැටෙයිද  දන්නේ නෑ ඕයි