ප්‍රතිලෝම

මේවා ෆෑන් නෙවෙයි නිකං රූං පෙති වගේ ,

වදින හුළඟක් නම් නෑ , කැරකෙනවා කියලා දැනෙන්නේ හිටපු ගමන් ඇහෙන ටක ටක සද්දේ නිසා .. ආණ්ඩුවේ කන්තෝරු කියන නමටම ගැලපෙනවා

දවසක ඔලුවට කඩන් වැටෙනකං දන්නේ නෑ... ශික් විතරක්...

ටක් ටක් ටක් ....

දොරට දෙතුන් පාරක් තට්ටු කරද්දී විනිවිද නොපෙනෙන බොඳවී ගිය වීදුරුව හරහා මට පෙනුනේ තැඹිලි පාට සාරියක් . ඒ සැනින් පුටුවේ හරිබරි ගැහී කොන්ද කෙලින් කරගත්ත මං ඉක්මනින් කොණ්ඩය අතින් හදාගෙන ළඟ තිබුණු ෆයිල් එකත් පෙරලගෙන ,

“ ඇතුලට එන්න “




ටීකක් ගාම්භීර කරගත් හඬකින් ශබ්දය පිටකලා .. ඔලුව නොඋස්සාම ෆයිල් එක තුලට එබෙමින් පෑනෙන් ෆයිල් එක තුල වූ අකුරු පේලි  අතර එහෙ මෙහෙ ගියේ මම අධික වැඩ බව ඇයට හැංගෙන්න හරිමින්.
යටසින් බලද්දී කිරි සුදු පැහැති පාවහන් යුගලය තුලින් එලියට පැමිණි සීරුවට කැපූ අලංකාර නිය සහිතව මා දෙසට පිය නගන්නී කවුරුන්ද යන්න ඒ වන විටත් මම දැන සිටියා .

“කවුද “

ඔලුව නොඋස්සාම මම ඇසුවත් ෆයිල් කවරය ඇතුලේ තියෙන කොලවල මොනවා තියෙනවාද කියා නොපෙනෙන තරමට මගේ හිත චංචල වෙලා බවනම් තේරුනා ..

"සර්”

මිනි කිංකිනි හෙලවෙනවා කියන්නේ මේකට වෙන්න ඇති

"ඔව් ... "

"සර් මේ පෝර සහනාධාර ෆෝම් ටික..."

"ඔහොම තියන්න "

ඔලුව උස්සලා ඒ රූපය දිහා බලන්න හිත හදාගත්තේ සෑහෙන වෙලාවකට පස්සේ , සුදෝ සුදු දත් දෙපෙළ යන්තමින් පේන්න හිනැහීගෙන තනි කරලට ගොතපු කොණ්ඩය පිට මැදින් වැටෙද්දී ,ඇත්තටම මට හිතට එන හැඟීම් කොහොම කාට කියන්නද ?

"සෞම්‍යා  ... ඔයා ඔය ටික ඔක්කොම චෙක් කලාද ?"

තෝරලා තෝරලා කියපු වචන ටික උගුරේ දෙතුන් පාරක් ගැට ගැහෙනවා වාගේ දැනුනත් කිසි අවුලක් නැතුව මොනවා හරි කියාගත්ත එකත් ලොකු දෙයක්.

සෞම්‍යා අලුතෙන් මෙහෙට ට්‍රාන්සර් ආපු දවසේ ඉඳන්ම ඔෆිස් එකට අමුතු ආලෝකයක් වැටුනා වගේ . කොයි වෙලෙත් එකම මූණු ටිකයි අව්වට කරවෙච්ච ගොවිනුයි ,ගොවි ගෑනුයි අතරේ ගත වෙච්ච් නීරස ජීවිතේට වැටුණු මීපැණි බිංදුවක් වගේ .

"ඔව් සර්..."

"එහෙනං තව ටිකකින් එන්නකෝ .."

ඒත් එක්කම මගේ මේසය දිහා බැලුව සෞම්‍යා නැගුනු  හිනාවක් ආයාසයකින් යටපත් කරගන්නවා වගේ මට දැනුනා . අතින් කට වගගත්තු සෞම්‍යා එලියා ගියේ ලස්සන ඇස්දෙකෙන් හිනාවෙන ගමන්

ෆෑන් එකේ ටක ටක සද්දේ ආයෙත්

මට පිටුපාලා යන සෞම්‍යා දිහා බලාගේ හිටපු මම පියවි සිහිය ලැබුවේ එයා දොරත් වහලා ගියාට පස්සේ මම හිතන්නේ .මේසේ දිහා බලපු මට තරු විසි වුනා ,මම හෙන බිසී වගේ පෙන්න හිටියට ෆයිල් එක තියාගෙන ඉඳලා තියෙන්නේ ඔලුවෙන් හිටවලා නෙ . ශේහ් වස විලි ලජජාවයි

*******

සෞම්‍යාගේ සෞම්‍ය ගතිය වැඩිපුර දැනුනේ මට වෙන්න ඇති. මෙච්චර දවසක් උනන්දුවෙන් නොකපපු රැවුල දැන් දැන් උදේට කීප සැරයක්ම අතගාලා බලලම බොහොම සීරුවට කැපෙනවා .

“මොකක්ද බාප්පේ මේ , බාප්පා මේවත් ගානවද . පොඩි අයියගේ පුතා දවසක් මම ගෙනාපු fair and handsome ක්‍රීම් එක උස්සගෙන ගේ මැදින් කෑ ගහගෙන දුවද්දී ගෙදර හැමෝම මගේ දිහා බැලුවේ සත්තු වත්තෙන් පැනපු ඇනකොන්ඩාවෙක් දිහා බලනවා වගේ
.
ශික් අම්මප මේ පොඩි උන්ටත් ඕනේ නැති දෙයක් නෑ. කෑවා ගම.

විලිලජ්ජාවේ සන්තෝසේ බැරුවා .

කන දෙපැත්තේ සුදුවේගෙන එන කොන්ඩේ ආපහු කළු වුනේ කොහොමද කියලා කවුරුත් ඇහුවෙනම් නෑ.
ඔලුව මැද යන්තම් මෝදුවෙන තට්ටේ කොහොම හරි වැහෙන විදිහට කට් එකක් ගහන්න කිව්වම බාබර් සාප්පුවේ මල්ලි බලං හිටියේ නිකං කින්ඩියට වගේ , දෙන්න හිතෙනවා හොම්බ සමතලා වෙන්න . මොකෝ යකෝ පිනට කරනවයි .

හැමදාම කන්නාඩිය ඉස්සරහ හිටගත්තම මං උත්සාහ කලේ වයසට ගිහිං නැති බව තහවුරු කරගන්න ..

මගේ පුංචි රෝස මලේ මමයි නුඹේ වියපත් බඹරා ....
නුඹ හීනෙන්වත් නොදකින කුමරා ......

නෙද්දකින් මොකාද යකෝ ඔය සින්දුව ලියපු එකා .

ඉස්සරනං හිතං හිටියේ ආණ්ඩුවේ කන්තෝරුවක රස්සාවක් ලැබුනම ඔක්කොම හරි කියලා . ඒත් ඒ අතරේ ලෝකේ ඉක්මනට කැරකුනා , අපි කැරකිලා වැටුනා . හැමදාම අටවාගෙන දුවන කාර් එකක අයිති කාරයෙක් වෙච්ච ,ආණ්ඩුවේ කන්තෝරුව වගේම දිරාපත් වෙන ජීවිත

*******

"සර්ට අලුවා කෑල්ලක් දෙන්නද ?"

"ආ සෞම්‍යා .. ගෙදරින් ගෙනාවද ?"

"ඔව් සර් ... ඔය පාර්සලේම ගන්න සර්, සර්ට තමා ගෙනාවේ .."

ඉස්සර  දවසක් යාළුවො එක්ක ගොළු හදවත ෆිල්ම් එක බලද්දී , ෆිල්ම් එකේ දම්මි සුගත්ට වෙරළු දෙනකොට අපේ හිටපු නසරානියෙක් හෝල් එක ඇතුලෙදි කෑගැහුවේ “ ඒයි අර තාත්තටද බං වෙරළු දෙන්නේ “  කියලා .

ශික් ඒක මොකටද මේ වෙලාවේ මතක් වෙන්නේ . එකත් එකටම ඒ අවලමා හිටියනං මෙතනත් මොනවා හරි කට කැඩිච්ච කතාවක් කියයි . පළාතේ නැති එකමයි හොඳ.

"ආ ..ආ මටම කියලා ගෙනාවද තෑන්ක්ස්.."

"හි හි අම්මා කිව්වා සර්ට දෙන්න කියල ...."

"සෞම්‍යා ගේ ගෙවල් කොහෙද ?"

එදා කොයි තරං වෙලා සෞම්යාක එක්ක කතා කර කර හිටියද , මම හිතන්නේ සෞම්‍යා ගේ හිතේත් මං ගැන පොඩි කැමැත්තක් තියෙනවා .

හතලිස් හතක් කියන්නේ වයසකද පිරිමියෙකුට

ඔය කිව්වට සෞම්‍යටත් තිස් දෙකක්වත් නැතැයි. මොකෝ දන්නේ නෑ මෙච්චර කල් නොබඳ හිටියේ .
ඔය ප්‍රශ්නේ මගෙන් ඇහුවා කියලා මොන උත්තරයක් දෙන්නද ?

*******

දවස් දෙකක් පාරේ අයිනේ නවත්තගෙන ඉඳලා අමාරුවෙන් යන වෙලාව අල්ලගෙන සෞම්‍යාව කාර් එකේ දාගෙන ආවා ඔෆිස් එකට. එදානම් මං වටපිට බැලුවේ ටිකක් ආඩම්බරෙන්, සෞම්‍යගෙ වටේ වැඩිපුර කැරකෙන අමිතයා හිටියේ නිකං ඇටිකෙහෙල් කාපු උගුඩුවා වගේ .

හොඳ වැඩේ ගල් ඉබ්බාට . ඕකා තමා හැම තැනම පතුරන්නේ මගේ බඩ ගැනයි , තට්ටේ ගැනයි , දැන් ඉරිසියාවේ පැලෙනවා ඇති , අනික බඩ පොඩ්ඩක් නැතිව මොන පර්සනල්ටියක්ද ...

එදායින් පස්සේ අඩුගානේ සතියට දවස් තුනක්වත් මට “ අහම්බෙන්” සෞම්‍යව මගදී මුණගැහිලා කාර් එකේ දාගෙන එන්න වෙනවා . හැමදාම යන්නත් හොඳ නෑ ,

එක්කෝ කමකුත් නෑ. කොහොම හරි දැනගන්නත් එපැයි
.
හවසට එක්ක යන්න තියෙනවනම් මරු. ඒත් කොහෙද අර බෙලිකටු මල්ල විනීතා නගිනවනේ බලෙන්ම සෞම්‍යත් එක්ක ,එතකොට ඉතිං සෞම්‍යගේ සුන්දරත්වය විඳිල්ල කෙසේ වෙතත් අර ගෑනිගේ කන්කරච්චලේ , හරියට දන්සල ළඟ විරිදු ඇහුවා වගේ. ගෙදර ගිහිල්ලත් පැය ගානක් යනකං කන් දෙකේ දෝංකාර දෙනවා .

*******

අදනම් අම්මේ දෙයියෝ දීපු දවසක් , දෙන දෙයියෝ ගෙටම ගෙනත් දෙනවා කියන්නේ ඕකනේ , කන්න පින තියෙනවනම් ඉබ්බා ගෙටම එනවලු

පෙරුම්පුරලා පෙරුම්පුරලා අවිනීත විනීතා නැති දවසේ යන්තං හිතේ හැටියට වෙලාවක් සෞම්‍යා එක්ක ඉන්න ලැබුනා ,

එත් එයා ටිකක් කලබලෙන් වගේ හිටියේ මොකෝ දන්නේ නෑ. කලබල නැත්තේ මොන කෙල්ලද ඔහොම වෙලාවට . ශික් අම්මපා කොච්චර දහිරිය දැම්මත් අදත් කිසිම දෙයක් කියාගන්න බැරි වුනානේ .

කොෆී ෂොප් එකට යනු කිව්වම නිකං හරියට රූම් එකක් ඇතුලට යන්න කතා කළා වගේ ගැහෙන්න ගත්තේ . හැබැයි ගෑනු ළමයි ඉන්න ඕන එහෙම තමා . මුළු පැය තුන්කාලටම වචන කීයද කතා කලේ .. එක්කෝ කමක් නෑ...

*******

ට්‍රිං ට්‍රිං ට්‍රිං ට්‍රිං

රෑ එකට විතර ෆෝන් එකට ආපු මැසේජ් එක දැකපු මට නිදිමත කොහෙන් ගියාද දන්නේ නෑ
.
“OYA NIDIDA?

KATHA KRADDI KIYANNA BARI WUNA,

API SENASURADATA ARA FILM EKA BALANNA YAMU

මොන ෆිල්ම් එකද ? මට මතක නෑනේ එහෙම එකක් සෞම්‍යා අහපු බවක්. ම්ම්ම්ම්ම්
කමක් නෑ , අමතක වුනා කියන්න හොඳ නෑ..

ගන්න ඕන කෝල් එකක් ,  ප්‍රතිචාරයක් නොමැත , ගෑනි ලැජ්ජාවට ඔෆ් කරලා ඇති . කමක් නෑ .

OK, API YAMU …

HETA KATHA KARAMU

එදානම් එලි වෙන්න සෑහෙන පරක්කු වුනා. වෙනදා මේ වෙද්දී ඉරත් පායලා .

මොන මගුලක්ද මංදා , කෙහෙල් මල් ට්‍රැෆික් ප්ලෑන්. පොලිසියේ ඉන්නේ අම්බරුවොද හැබෑට , වෙනදා යන එන පාරවල් ඔක්කොම වෙනස් කරලා , ඒ මදිවට බ්ලොක් වෙලා . ශික් හොඳටම පරක්කුයි .

ඔෆිස් එකට අඩිය තියනකොටම දැක්කේ සෞම්‍යා විනීතා එක්ක කතාවක් , එක සැරේම මාව දැකපු සෞම්‍යා  ගැස්සිලා ගියා , මොකෝ දන්නේ නෑ , නිකං අඬලා වගේ ,මූණත් තඩිස්සි වෙලා , එයාටත් ඊයේ රෑ නින්ද යන නැතුව ඇති.

කෝල නොවෙන් රත්තරනේ
නුඹට නොකීවට දැක්ක දිනේ සිට ...

පව් ලැජ්ජා ඇති .

*******

එකසැරේම දොර විසි වෙන්න ඇරගෙන ආවේ අඩි හයක් විතර උස , දකුණු ඇහැට යටින් කිනිස්සක පච්චයක් ගහපු මිනිහෙක්.

මට කිසි දෙයක් හිතාගන්න ලබුනේවත් නෑ , ඌ මාව උස්සලා ගත්තේ නිකං පුළුන් බෝනික්කෙක් උස්සලා ගන්නවා වගේ .

"අඩෝ තට්ට නාකියා , තෝ තමයි එහෙනං මනමාලයා .. ලොකු සර් ....................හුහ්...පර බල්ලා තෝ හෙට ඉඳන් බත් කන්නේ මේ දත් ටික නැතුව .."

කියපු එකා මගේ මූණ හරහා මිට මොලවලා පාරක් ඇන්නේ එකසරේම, ඇත්තටම තරු පෙන්වා නේද කියලා මට හිතුනා ..

හම්මේ ... ෆෑන් එකත් ආපහු ටක ටක ටක සද්දෙන් කැරකෙනවා

"හැමදාම මහා රෑ ඇහැරගෙන මේ ගෑනි කාත් එක්කද කටු කුටු ගාන්නේ කියලා මාත් හොයා හොයා හිටියේ "

හැමදාම ? හැමදාම ? හැමදාම කොහෙද ඊයෙනෙ ඉස්සෙල්ලම .... දෙයියනේ සෞම්‍යා ඔයා .....???????

"පට්ට බැල්ලිට ඊයේ අමතක වෙලා මැසේජ් මකන්න . අද  දෙන්නං උඹට ඉස්ම යන්න ...."

වයසක සිකුරුටි අංකල් ඇවිත් අර මනුස්සයට වඳින හැටි මට නිලංකාර වෙද්දී පෙනුනේ ෆෑන් එකේ ටක ටක සද්දේ ආපහු ඇහෙනවත් එක්කමයි .